واشنگٹن: امریکی صدر ڈونلڈ ٹرمپ کی انتظامیہ میں ایران کے خلاف جنگ کے معاملے پر اختلافات شدت اختیار کرگئے ہیں۔ امریکی نائب صدر جے ڈی وینس نے مبینہ طور پر نجی محفلوں میں اسرائیلی وزیراعظم بن یامین نیتن یاہو کی حکمتِ عملی پر سخت تنقید کرتے ہوئے خبردار کیا ہے کہ یہ جنگ ری پبلکن پارٹی کے لیے سیاسی نقصان کا باعث بن سکتی ہے۔امریکی ویب سائٹ ’ایگزیوس‘ نے جمعرات کو باخبر ذرائع کے حوالے سے رپورٹ کیا ہے کہ جے ڈی وینس نے نجی گفتگو کے دوران نیتن یاہو پر ایران کے معاملے میں ہر بات پر غلط ہونے کا الزام عائد کیا۔رپورٹ کے مطابق نائب صدر نے صدر ڈونلڈ ٹرمپ پر بھی زور دیا کہ وہ جنگ کے خاتمے کے لیے مذاکرات کا راستہ اختیار کریں۔ وینس کا مؤقف تھا کہ ایران کے خلاف جنگ امریکی ووٹرز میں غیر مقبول ہے اور اس کے سیاسی اثرات ری پبلکن پارٹی کے لیے نقصان دہ ثابت ہوسکتے ہیں۔ذرائع کے مطابق جے ڈی وینس نے خبردار کیا کہ جنگ کے باعث ری پبلکنز کو کانگریس کا کنٹرول کھونے کا خطرہ لاحق ہوسکتا ہے اور منگل کو ہونے والے وسط مدتی انتخابات میں پارٹی کو شکستوں کا سامنا کرنا پڑ سکتا ہے۔یہ اختلافات ایسے وقت میں سامنے آئے ہیں جب ایران کے خلاف جنگ اور اس کے سیاسی و معاشی اثرات امریکی سیاست میں اہم بحث کا موضوع بنے ہوئے ہیں۔ تاہم جے ڈی وینس سے منسوب یہ تبصرے نجی گفتگو سے متعلق ذرائع کے حوالے سے رپورٹ کیے گئے ہیں اور نائب صدر کی جانب سے ان بیانات کی باضابطہ تصدیق کا ذکر نہیں کیا گیا۔
تازہ ترین خبروں، تجزیوں اور روز مرہ کے واقعات کی اپ ڈیٹس کے لیے واٹس ایپ پر روزنامہ ’’گل بات‘‘ کا ’آفیشل چینل یا آفیشل گروپ‘ جوائن کریں