ترجمان دفتر خارجہ نے کہا ہے کہ ایران پاکستان گیس پائپ لائن منصوبے پر تکنیکی مشاورت جاری ہے۔ یوکرینی صدر کے بیان پر یوکرین سے باضابطہ وضاحت طلب کی جائے گی ۔
ترجمان دفتر خارجہ شفقت علی خان نے پریس بریفنگ دیتے ہوئے یوکرین کی جانب سے پاکستانیوں کی جنگ میں شرکت کے الزامات کو بے بنیاد قرار دیتے ہوئے سختی سے مسترد کردیا، اور کہا ہے کہ اگر یوکرین کے پاس کوئی ثبوت ہے تو وہ فراہم کرے۔ پاکستان اس معاملے پر یوکرینی حکام سے وضاحت طلب کرچکا ہے۔
بریفنگ میں ترجمان نے ایرانی صدر کے حالیہ دورہ پاکستان کے حوالے سے کہاکہ ایرانی صدر مسعود پزشکیان نے صدر آصف علی زرداری اور وزیراعظم شہباز شریف سے ملاقاتیں کیں۔ ان ملاقاتوں میں دونوں ممالک کے درمیان برادرانہ تعلقات، اسرائیلی جارحیت کے خلاف یکجہتی، تجارتی معاہدے، بارٹر ٹریڈ اور تجارتی کوٹہ بڑھانے جیسے اہم امور پر گفتگو کی گئی۔
فلسطین کے حوالے سے بات کرتے ہوئے ترجمان نے بتایا کہ پاکستان نے غزہ کے عوام کے لیے 18ویں امدادی کھیپ روانہ کی ہے۔ وزیر اطلاعات عطااللہ تارڑ نے اسلام آباد ایئرپورٹ سے امداد روانہ کی، جس میں خشک راشن، تیار خوراک اور ادویات شامل ہیں۔
ترجمان نے کہا کہ پاکستان فلسطینی ریاست کے قیام اور دو ریاستی حل کی مکمل حمایت کرتا ہے، جس میں القدس الشریف فلسطینی دارالحکومت ہو۔
کشمیر کے تناظر میں ترجمان دفتر خارجہ نے کہاکہ پاکستان نے 5 اگست کو یومِ استحصال کے طور پر منایا اور بھارت کے یکطرفہ اقدامات کی شدید مذمت کی، جن کے ذریعے کشمیریوں کو ان کے حق خودارادیت اور سرزمین سے محروم کرنے کی کوشش کی جا رہی ہے۔
ترجمان نے بلوچستان اور خیبرپختونخوا میں دہشتگردی کے حالیہ واقعات میں بیرونی عناصر کے ملوث ہونے کی نشاندہی کی اور کہا کہ افغانستان میں دہشتگردوں کی پناہ گاہوں کے معاملے پر افغان حکام سے بات چیت جاری ہے۔ انہوں نے کہا کہ خطے میں دہشتگردی کو بھارت کی سرپرستی حاصل ہے۔
آپریشن سندور میں اسرائیلی معاونت کے حوالے سے سوال کا جواب دیتے ہوئے ترجمان نے کہا کہ ہتھیاروں کے ماخذ کو خاطر میں لائے بغیر پاکستان نے کامیابی کے ساتھ اپنی خودمختاری اور سالمیت کا دفاع کیا۔انہوں نے کہاکہ ایران پاکستان گیس پائپ لائن منصوبے پر تکنیکی مشاورت جاری ہے جبکہ سیکریٹری آف اسٹیٹ مارکو روبیو کی وزیر خزانہ اسحاق ڈار سے گفتگو ایک معمول کی سفارتی بات چیت تھی۔
افغان سفیر کے عہدے کی اپ گریڈیشن پر ترجمان نے کہاکہ یہ دونوں ممالک کے درمیان طے پانے والے معاہدے کے مطابق ہوا ہے اور اس میں صدر پاکستان کو اسناد پیش کرنے کی ضرورت نہیں تھی۔ افغان وزیر خارجہ پر اقوام متحدہ کی سفری پابندیوں پر ترجمان نے کوئی تبصرہ نہیں کیا۔
شفقت علی خان نے یہ بھی کہاکہ اقوام متحدہ جنرل اسمبلی اجلاس کے لیے پاکستان کی شرکت کے حوالے سے تیاریاں جاری ہیں۔ امریکی حکام کے ساتھ کسی قسم کا خفیہ معاہدہ نہیں کیا گیا۔
تازہ ترین خبروں، تجزیوں اور روز مرہ کے واقعات کی اپ ڈیٹس کے لیے واٹس ایپ پر روزنامہ ’’گل بات‘‘ کا ’آفیشل چینل یا آفیشل گروپ‘ جوائن کریں