اسپین نے روس کے ساتھ جاری جنگ میں یوکرین کی دفاعی صلاحیتوں کو مضبوط بنانے کے لیے 437 ملین یورو (تقریباً 490 ملین امریکی ڈالر) کے نئے فوجی امدادی پیکج کا اعلان کردیا ہے۔ اس امداد کا مقصد یوکرین کو روسی میزائل اور ڈرون حملوں سے بچانے اور اس کی اہم دفاعی ضروریات پوری کرنے میں مدد فراہم کرنا ہے۔یوکرین کے صدر وولودیمیر زیلنسکی نے جمعرات 5 نومبر 2026 کو میڈرڈ میں اسپین کے وزیراعظم پیڈرو سانچیز سے ملاقات کے بعد امدادی پیکج کی تصدیق کی۔ انہوں نے اسپین کی مسلسل حمایت پر اظہار تشکر کرتے ہوئے کہا کہ دونوں رہنماؤں نے امداد کی تفصیلات اور یوکرین کی فوری دفاعی ضروریات پر تفصیلی گفتگو کی۔ملاقات کے دوران زیلنسکی نے اسپین کے وزیراعظم کو یوکرین کے توانائی کے نظام، بجلی کی ترسیل، پانی کی فراہمی، لاجسٹکس اور ریلوے نیٹ ورک پر روسی حملوں سے ہونے والے نقصانات سے بھی آگاہ کیا۔یوکرینی صدر کے مطابق روسی حملوں کے نتیجے میں رواں سال یوکرین کے بڑی تعداد میں انجن اور لوکوموٹیوز تباہ یا متاثر ہوئے ہیں۔ ان کا کہنا تھا کہ گزشتہ برسوں کی مکمل جنگ کے دوران بھی ریلوے کے شعبے کو اس نوعیت کے نقصانات کا سامنا نہیں کرنا پڑا تھا۔زیلنسکی نے خصوصاً دارالحکومت کیف کی صورت حال کو تشویش ناک قرار دیتے ہوئے کہا کہ ملک کا بجلی اور پانی کی فراہمی کا نظام مسلسل حملوں کی زد میں ہے۔ ان حالات میں فوجی امداد کے ساتھ انسانی ہمدردی کی بنیاد پر تعاون کی ضرورت بھی بڑھ گئی ہے۔
تازہ ترین خبروں، تجزیوں اور روز مرہ کے واقعات کی اپ ڈیٹس کے لیے واٹس ایپ پر روزنامہ ’’گل بات‘‘ کا ’آفیشل چینل یا آفیشل گروپ‘ جوائن کریں