ماسکو: روس کے پارلیمانی انتخابات کے ابتدائی نتائج کے مطابق صدر ولادیمیر پیوٹن کی حمایت یافتہ جماعت یونائیٹڈ رشیا کو واضح برتری حاصل ہوگئی ہے۔رائٹرز کے مطابق 95 فیصد سے زائد ووٹوں کی گنتی مکمل ہونے کے بعد یونائیٹڈ رشیا نے تقریباً 57.83 فیصد ووٹ حاصل کیے ہیں، جبکہ جماعت کو 450 رکنی اسٹیٹ ڈوما میں تقریباً 355 نشستیں ملنے کا امکان ظاہر کیا گیا ہے۔یہ انتخابات 2022 میں یوکرین پر روس کے مکمل حملے کے آغاز کے بعد ملک میں ہونے والے پہلے پارلیمانی انتخابات ہیں۔ ابتدائی نتائج کے مطابق کمیونسٹ پارٹی تقریباً 13.8 فیصد ووٹوں کے ساتھ دوسرے نمبر پر ہے۔لبرل ڈیموکریٹک پارٹی، نیو پیپل اور اے جسٹ رشیا بھی ابتدائی نتائج کے مطابق پارلیمان میں نشستیں حاصل کرنے کی پوزیشن میں ہیں۔روس کے مرکزی انتخابی کمیشن کے مطابق انتخابات میں ووٹر ٹرن آؤٹ تقریباً 57 فیصد رہا۔ 450 رکنی ایوانِ زیریں کے نصف ارکان پارٹی فہرستوں کے ذریعے جبکہ باقی نصف سنگل سیٹ حلقوں سے منتخب کیے جاتے ہیں۔انتخابات کے دوران یوکرین کی جانب سے روس کے مختلف علاقوں میں ڈرون حملوں کی اطلاعات بھی سامنے آئیں۔ روسی حکام کے مطابق ماسکو کے علاقے میں ہونے والے حملوں میں ہلاکتیں ہوئیں جبکہ ایک آئل ریفائنری کو بھی نقصان پہنچا۔دوسری جانب یوکرین نے روس کے زیر قبضہ یوکرینی علاقوں میں ہونے والی ووٹنگ کو غیر قانونی قرار دیا ہے، جبکہ روسی حکام نے انتخابات کو ملک کے سیاسی عمل کا حصہ قرار دیا ہے۔حکام کے مطابق حتمی انتخابی نتائج تمام ووٹوں کی گنتی اور متعلقہ قانونی کارروائی مکمل ہونے کے بعد جاری کیے جائیں گے۔
تازہ ترین خبروں، تجزیوں اور روز مرہ کے واقعات کی اپ ڈیٹس کے لیے واٹس ایپ پر روزنامہ ’’گل بات‘‘ کا ’آفیشل چینل یا آفیشل گروپ‘ جوائن کریں