پاکستانی شوبز انڈسٹری کے معروف اداکار اور میزبان فیصل قریشی ان دنوں اپنے نمایاں وزن میں کمی اور جسمانی تبدیلی کے باعث سوشل میڈیا پر توجہ کا مرکز بنے ہوئے ہیں۔حال ہی میں جم سے شیئر کی گئی اپنی نئی تصویر میں مسلز کی نمائش کے بعد انہیں سوشل میڈیا صارفین کی جانب سے تنقید کا سامنا کرنا پڑ رہا ہے۔ اداکار نے اپنے سوشل میڈیا اکاؤنٹ پر جم کی تصویر شیئر کی، جس میں وہ اپنی فٹنس اور مسلز دکھاتے نظر آئے۔ اس موقع پر انہوں نے ورزش، غذائی معمولات اور جسمانی فٹنس برقرار رکھنے کے اپنے تجربات بھی مداحوں کے ساتھ شیئر کیے۔فیصل قریشی کا کہنا تھا کہ وہ گزشتہ چھ برس سے باقاعدگی سے ورزش کر رہے ہیں، تاہم دو سال قبل انہیں متوازن غذا اور مناسب غذائیت کی اہمیت کا حقیقی احساس ہوا۔ ان کے مطابق جسمانی فٹنس کے لیے صرف سخت ورزش کافی نہیں بلکہ یہ جاننا بھی ضروری ہے کہ کیا، کتنا اور کب کھانا چاہیے۔ اس کے ساتھ مناسب ورزش، جسم کو آرام دینا اور ضروری وٹامنز کا استعمال بھی اہم کردار ادا کرتے ہیں۔اداکار نے مزید کہا کہ عمر بڑھنے کے ساتھ جسمانی تبدیلیوں کے مطلوبہ نتائج حاصل کرنے میں وقت لگ سکتا ہے، تاہم درست معلومات، مستقل مزاجی اور نظم و ضبط کے ذریعے کامیابی حاصل کی جا سکتی ہے۔ ان کے بقول عمر کو کبھی بھی اپنی ترقی کی راہ میں رکاوٹ نہیں بننے دینا چاہیے کیونکہ بہتری کی کوئی عمر نہیں ہوتی۔فیصل قریشی کی نئی تصویر سوشل میڈیا پر بحث کا موضوع بن گئی ہے۔ بعض صارفین نے ان کے غیر معمولی وزن میں کمی اور موجودہ جسمانی ساخت پر حیرت کا اظہار کیا، جبکہ کئی افراد نے ان کے نئے لُک کو تنقید کا نشانہ بنایا۔ایک صارف نے تبصرہ کرتے ہوئے دعویٰ کیا کہ اداکار کو اپنی فٹنس کے ساتھ ممکنہ ہارمونل علاج، یعنی ٹیسٹوسٹیرون ریپلیسمنٹ تھراپی (TRT) کے بارے میں بھی وضاحت کرنی چاہیے۔ ایک اور صارف نے ان کی جسمانی چربی میں نمایاں کمی پر سوال اٹھایا۔کچھ مداحوں نے فیصل قریشی کے موجودہ انداز کا موازنہ ان کے مشہور ڈرامے ’بشر مومن‘ کے کردار سے کرتے ہوئے کہا کہ انہیں اداکار کا پہلے والا لُک زیادہ پسند تھا۔ ایک صارف نے دلچسپ تبصرہ کیا کہ چہرہ تو فیصل قریشی کا ہے لیکن جسم کسی اور کا محسوس ہوتا ہے، جبکہ ایک اور صارف نے ان کی نئی جسمانی ساخت کو غیر معمولی قرار دیا۔اس کے علاوہ بعض سوشل میڈیا صارفین نے اوزیمپک (Ozempic) کے استعمال سے متعلق بھی قیاس آرائیاں کیں، تاہم اداکار کی جانب سے اس حوالے سے کوئی تصدیق سامنے نہیں آئی۔واضح رہے کہ فیصل قریشی کا شمار پاکستان کے باصلاحیت اور ورسٹائل اداکاروں میں ہوتا ہے۔ انہوں نے ’میری ذات ذرہ بے نشان‘، ’میں عبدالقادر ہوں‘، ’بشر مومن‘، ’مقدر‘، ’خائی‘، ’حیوان‘، ’فرق‘، ’ہک‘، ’بہروپیا‘ اور ’فتور‘ سمیت متعدد کامیاب ڈراموں میں اپنی اداکاری کے جوہر دکھائے ہیں۔حال ہی میں ڈرامہ سیریل ’کیس نمبر 9‘ میں کامران کے کردار میں ان کی پرفارمنس کو بھی ناظرین کی جانب سے خوب سراہا گیا، جبکہ ڈرامے میں ان کا منفرد انداز بھی خاصا پسند کیا گیا۔
تازہ ترین خبروں، تجزیوں اور روز مرہ کے واقعات کی اپ ڈیٹس کے لیے واٹس ایپ پر روزنامہ ’’گل بات‘‘ کا ’آفیشل چینل یا آفیشل گروپ‘ جوائن کریں