ممبئی: امریکی وزیر خارجہ مارکو روبیو نے کہا ہے کہ پاکستان کی جوہری صلاحیت اور جغرافیائی اہمیت کے باعث امریکا کے لیے اسلام آباد کے ساتھ تعلقات برقرار رکھنا ضروری ہے۔ انہوں نے امریکی پالیسی کا موازنہ بھارت کے ایران کے ساتھ تعلقات سے کرتے ہوئے کہا کہ مختلف ممالک کے ساتھ رابطے برقرار رکھنا سفارت کاری کا اہم حصہ ہے۔بھارتی ٹی وی نیٹ ورک 18 کو انٹرویو دیتے ہوئے مارکو روبیو نے کہا کہ امریکی وزیر خارجہ کی حیثیت سے انہیں ایسے ممالک کے ساتھ بھی تعلقات قائم رکھنے ہوتے ہیں جن کے ساتھ بعض معاملات پر اختلافات موجود ہوں۔انہوں نے کہا کہ پاکستان ایک جوہری طاقت ہے اور جغرافیائی اعتبار سے بھی اہم مقام رکھتا ہے، اس لیے امریکا کے لیے اس کے ساتھ رابطہ برقرار رکھنا ضروری ہے۔مارکو روبیو کے مطابق جس طرح بھارت کو ایران کے ساتھ تعلقات رکھنے اور اس کی قیادت سے ملاقاتیں کرنے کی ضرورت پیش آتی ہے، اسی طرح امریکا کے لیے بھی پاکستان کے ساتھ رابطہ برقرار رکھنا اہم ہے۔امریکی وزیر خارجہ نے کہا کہ مختلف ممالک کے ساتھ تعلقات میں توازن برقرار رکھنا آسان نہیں، تاہم یہ امریکی خارجہ پالیسی کا لازمی حصہ ہے۔ ان کے بقول، پاکستان کے ساتھ رابطے برقرار رکھنے سے واشنگٹن کو ایسے اقدامات کی حوصلہ شکنی میں مدد مل سکتی ہے جن پر بھارت کو تشویش لاحق ہے۔روبیو نے واضح کیا کہ امریکا دنیا میں کہیں بھی دہشت گردی اور دہشت گردی کی سرپرستی کی مخالفت کرتا ہے۔ان کے یہ بیانات ایسے وقت میں سامنے آئے ہیں جب پاکستان اور امریکا کے تعلقات، علاقائی سلامتی اور خطے میں سفارتی روابط اہمیت اختیار کیے ہوئے ہیں۔ ان کے بیان سے ظاہر ہوتا ہے کہ واشنگٹن پاکستان کے ساتھ رابطے برقرار رکھنے کو اپنی خارجہ پالیسی کا ایک اہم پہلو سمجھتا ہے۔
تازہ ترین خبروں، تجزیوں اور روز مرہ کے واقعات کی اپ ڈیٹس کے لیے واٹس ایپ پر روزنامہ ’’گل بات‘‘ کا ’آفیشل چینل یا آفیشل گروپ‘ جوائن کریں