تہران: پاسداران انقلاب کے کمانڈر کے مشیر محمد رضا نقدی نے دعویٰ کیا ہے کہ امریکا کے ساتھ جاری جنگ کے دوران ایران نے اہم فوجی تجربہ حاصل کیا اور امریکی فوج پہلے کے مقابلے میں کمزور دکھائی دی۔امریکی نشریاتی ادارے پی بی ایس کو انٹرویو دیتے ہوئے محمد رضا نقدی نے کہا کہ ایران اب تک جنگ میں کامیاب رہا ہے اور مستقبل میں بھی کامیابی کا سلسلہ جاری رکھنے کے لیے پُرعزم ہے۔ان کا کہنا تھا کہ جنگ جتنی طویل ہوگی، ایران کو اتنا ہی زیادہ فوجی تجربہ حاصل ہوگا۔ ایران کو اس سے قبل امریکا کے ساتھ براہِ راست اور حقیقی جنگ کا تجربہ نہیں تھا، تاہم موجودہ جنگ نے ایرانی فورسز کو امریکی فوج کے خلاف حکمت عملی سیکھنے کا موقع فراہم کیا۔محمد رضا نقدی کے مطابق گزشتہ پانچ ماہ کے دوران ایرانی افواج نے جنگ کے میدان میں بہت کچھ سیکھا اور اس دوران یہ بھی مشاہدہ کیا کہ امریکی فوج تہران کے سابق اندازوں سے زیادہ کمزور ہے۔انہوں نے کہا کہ جنگ کے دوران حاصل ہونے والا تجربہ مستقبل میں ایران کی فوجی حکمت عملی کے لیے اہم ثابت ہوگا۔ ایرانی فورسز نے اپنی صلاحیتوں کو آزمانے کے ساتھ امریکی فوج کی جنگی حکمت عملی اور صلاحیتوں کا بھی جائزہ لیا۔محمد رضا نقدی نے مزید کہا کہ ایران خود کو موجودہ جنگ میں فاتح سمجھتا ہے اور مستقبل میں بھی کامیابی کے لیے کوششیں جاری رکھے گا۔واضح رہے کہ ایرانی عہدیدار کے یہ دعوے ان کا اپنا مؤقف ہیں، جبکہ امریکی فوج یا حکام کی جانب سے ان دعوؤں پر فوری طور پر کوئی ردعمل سامنے نہیں آیا۔
تازہ ترین خبروں، تجزیوں اور روز مرہ کے واقعات کی اپ ڈیٹس کے لیے واٹس ایپ پر روزنامہ ’’گل بات‘‘ کا ’آفیشل چینل یا آفیشل گروپ‘ جوائن کریں