وزیراعظم پاکستان شہباز شریف نے کہا ہے کہ فتنہ الخوارج کے مکمل خاتمے تک پاک فوج آپریشنز جاری رکھے گی، یقین رکھیں دہشتگردی کا سر کچلنے تک چین سے نہیں بیٹھیں گے۔
جی ایچ کیو راولپنڈی میں یوم دفاع اور شہدا کی تقریب سے خطاب کرتے ہوئے وزیراعظم پاکستان نے کہاکہ ناقابل تسخیر دفاع ہماری اولین قومی ضرورت ہے، ہم کسی ہمسایہ ملک کے خلاف جارحانہ عزائم نہیں رکھتے۔
انہوں نے کہاکہ قوموں کی تقسیم ملکی سلامتی کے لیے خطرات پیدا کرتی ہے، اس لیے پاکستان کی خاطر ذاتی مفادات اور خواہشات کو قربان کیا جائے۔
وزیراعظم نے کہاکہ وطن پر لخت جگر قربان کرنے والی ماؤں کو سلام پیش کرتا ہوں، خطے کے امن کے لیے پاکستان نے ہمیشہ مثبت کردار ادا کیا۔
انہوں نے کہاکہ پاکستان ایسے محل و وقوع پر واقع ہے جو کئی تہذیبوں کا سنگم ہے، یہاں بہت سی طاقتوں کے مفادات ٹکراتے ہیں، ہم اپنی آزادی، عزت اور مفادات پر کبھی سمجھوتہ نہیں کریں گے۔
شہباز شریف نے کہاکہ قوموں کو خوشحالی کی منزل ہمیشہ امن کے راستے سے ملتی ہے، گالی یا گولی کسی مسئلے کا حل نہیں، ہم نے دشمنوں کے ناپاک عزائم کو بار ہا شکست دی ہے۔
انہوں نے کہاکہ وطن کی خاطر جانیں قربان کرنے والوں کو جتنا بھی خراج عقدیت پیش کیا جائے کم ہے، مسلح افواج پاکستان نے دشمن کے ناپاک عزائم کوخاک میں ملا دیا۔
وزیراعظم نے کہاکہ لاہور کے جمخانہ میں چائے پینے کے عزائم رکھنے والوں کا خواب چکنا چور ہوگیا، آج کے دن شہدا کی عظیم ماؤں کوخراج تحسین پیش کرتا ہوں۔
تازہ ترین خبروں، تجزیوں اور روز مرہ کے واقعات کی اپ ڈیٹس کے لیے واٹس ایپ پر روزنامہ ’’گل بات‘‘ کا ’آفیشل چینل یا آفیشل گروپ‘ جوائن کریں