واشنگٹن: امریکا میں ہونے والے انتخابات میں پاکستانی نژاد امریکی امیدواروں نے مختلف ریاستوں میں حصہ لیا، جن میں سے تین امیدوار ریاستی اسمبلی کی نشستیں جیتنے میں کامیاب ہوگئے، جبکہ ایک امیدوار کو شکست کا سامنا کرنا پڑا۔امریکی میڈیا کے مطابق ٹیکساس کی ریاستی اسمبلی کے ارکان سلمان بھوجانی اور سلیمان لالانی دوبارہ منتخب ہوگئے، جبکہ جارجیا میں پاکستانی نژاد امیدوار فاروق مغل نے بھی ریاستی اسمبلی کی نشست جیت لی۔رپورٹس کے مطابق سلمان بھوجانی نے ٹیکساس کے ڈسٹرکٹ 92 سے انتخاب لڑتے ہوئے 67 فیصد ووٹ حاصل کیے اور ایک بار پھر ریاستی اسمبلی کے رکن منتخب ہوگئے۔اسی طرح سلیمان لالانی نے ٹیکساس کے ڈسٹرکٹ 76 سے کامیابی حاصل کی۔ امریکی میڈیا کے مطابق انہوں نے بھی تقریباً 67 فیصد ووٹ حاصل کیے اور دوبارہ ریاستی اسمبلی میں پہنچ گئے۔دوسری جانب جارجیا میں پاکستانی نژاد امریکی امیدوار فاروق مغل نے ریاستی اسمبلی کی نشست جیت لی۔ ان کی کامیابی کو امریکی ریاستی سیاست میں پاکستانی نژاد امیدواروں کی ایک اور پیش رفت قرار دیا جا رہا ہے۔تاہم فلوریڈا میں ری پبلکن پارٹی کے پاکستانی نژاد امیدوار امتیاز محمد ریاستی اسمبلی کا انتخاب جیتنے میں ناکام رہے اور انہیں شکست کا سامنا کرنا پڑا۔ان انتخابی نتائج کے ساتھ ٹیکساس اور جارجیا میں تین پاکستانی نژاد امیدوار ریاستی اسمبلی تک پہنچنے میں کامیاب ہوئے، جبکہ فلوریڈا سے حصہ لینے والے امتیاز محمد کامیابی حاصل نہ کرسکے۔ دستیاب معلومات کے مطابق فاروق مغل اور امتیاز محمد کے حاصل کردہ ووٹوں کی تفصیلات سامنے نہیں آئیں۔
تازہ ترین خبروں، تجزیوں اور روز مرہ کے واقعات کی اپ ڈیٹس کے لیے واٹس ایپ پر روزنامہ ’’گل بات‘‘ کا ’آفیشل چینل یا آفیشل گروپ‘ جوائن کریں