امریکا کے صدر ڈونلڈ ٹرمپ نے روس یوکرین تنازع کے حل پر گفتگو کے لیے روسی صدر ولادیمیر پیوٹن کے ساتھ الاسکا میں ملاقات کے بعد یوکرین کے صدر دلودومیر زیلنسکی کو ملاقات کے لیے اپنے دفتر بلا لیا۔
امریکی صدر ڈونلڈ ٹرمپ کا اس حوالے سے کہنا ہے کہ یوکرینی صدر زیلنسکی پیر کو اوول آفس آئیں گے، اگر سب ٹھیک رہا تو پھر روسی صدر پیوٹن کے ساتھ دوبارہ ملاقات کا وقت طے کریں گے۔
ڈونلڈ ٹرمپ نے کہا کہ روس یوکرین جنگ کا خاتمہ صرف امن معاہدے سے ممکن ہے، عارضی جنگ بندی نہیں، براہِ راست امن معاہدہ ضروری ہے، صرف امن معاہدہ ہی خوفناک جنگ کو ختم کر سکتا ہے۔
امریکی صدر ڈونلڈ ٹرمپ نے الاسکا کے جوائنٹ بیس ایلمینڈورف-رچرڈسن (JBER) میں تقریباً 4 گھنٹے تک روسی ہم منصب سے ملاقات کی تھی اور دونوں رہنماؤں نے ملاقات کو تعمیری قرار دیا تھا۔روسی صدر سے ملاقات کے بعد ڈونلڈ ٹرمپ نے یوکرین کے صدر ولودومیر زیلنسکی سے بھی ٹیلیفونک گفتگو کی تھی۔
تازہ ترین خبروں، تجزیوں اور روز مرہ کے واقعات کی اپ ڈیٹس کے لیے واٹس ایپ پر روزنامہ ’’گل بات‘‘ کا ’آفیشل چینل یا آفیشل گروپ‘ جوائن کریں