چیئرمین پی سی بی محسن نقوی کا کہنا ہے کہ چیمپئنز ٹرافی پاکستان میں ہوگی اور بے فکر رہیں تمام ٹیمیں ٹرافی کھیلنے پاکستان آئیں گی ۔ چیمپئنز ٹرافی میں بھارتی ٹیم کی آمد سے متعلق سوال پر انہوں نے کہا کہ بھارت کے معاملے میں اللہ بہتر کرے گا ۔ کراچی میں صحافیوں سے غیر رسمی گفتگو میں محسن نقوی کا کہنا تھا کہ15 دسمبر تک اسٹیڈیمز کا کام مکمل ہو جائے گا ۔
محسن نقوی نے کہا کہ ون ڈے اور ٹی 20 ٹیم کے کوچ گیری کرسٹن سے معاہدہ پی سی بی نے ختم نہیں کیا بلکہ انہوں نے استعفیٰ دیا ۔ انہوں نے کہا کہ وائٹ بال کوچ کیلیے پانچ سے سات لوگوں سے بات چیت چل رہی ہے ، عاقب جاوید کے حوالے سے کوئی فیصلہ نہیں ہوا ۔ ہمارے پاس کئی عہدے خالی ہیں ان پر بندے رکھنے ہیں۔چیئرمین پی سی بی نے کہا کہ کسی کھلاڑی کی سلیکشن میں دخل اندازی نہیں کرتا ۔
فخر زمان ٹیم میں ہو گا یا نہیں یہ سلیکشن کمیٹی بتائے گی ، کسی کھلاڑی کا نہیں کہا کہ اس کو رکھیں یا اس کو نہیں ۔ چیئرمین پی سی بی محسن نقوی نے کرکٹرز سے کراچی میں ملاقات کی اور ان کا حوصلہ بڑھایا ۔ قومی ٹیم کے کھلاڑی آج رات دورہ آسٹریلیا کیلیے روانہ ہوں گے ۔
تازہ ترین خبروں، تجزیوں اور روز مرہ کے واقعات کی اپ ڈیٹس کے لیے واٹس ایپ پر روزنامہ ’’گل بات‘‘ کا ’آفیشل چینل یا آفیشل گروپ‘ جوائن کریں