قومی اسمبلی کے سپیکر سردار ایاز صادق اٹھارہویں سپیکرز کانفرنس منعقد کرنے جا رہے ہیں، جس پر سپیکر قانون ساز اسمبلی آزادکشمیر چوہدری لطیف اکبر نے انہیں مبارکباد پیش کی۔ چوہدری لطیف اکبر نے کہا کہ یہ کانفرنس سردار ایاز صادق کی ذاتی کاوشوں کا نتیجہ ہے، اور پاکستان کی تمام صوبائی اسمبلیوں، آزادکشمیر اور گلگت بلتستان اسمبلیوں کا اس میں شامل ہونا خوش آئند ہے۔
انہوں نے مزید کہا کہ اس کانفرنس کے ذریعے متفقہ لائحہ عمل تیار کرنے اور اسمبلیوں کی استعداد کار بڑھانے میں مدد ملے گی، جس سے فیصلہ سازی میں بھی بڑی مدد ملے گی۔ چوہدری لطیف اکبر نے اس بات پر زور دیا کہ اس سپیکرز کانفرنس سے جمہوریت مضبوط ہوگی اور قومی اسمبلی کے سپیکر کو یقین دلایا کہ جمہوری اداروں کی مضبوطی اور اسمبلیوں کی استعداد کار کو بڑھانے میں بھرپور تعاون کیا جائے گا۔
چوہدری لطیف اکبر نے کہا کہ سپیکرز کانفرنس کا انعقاد سیز فائر لائن کے دوسری جانب ایک مضبوط پیغام بھی بھیجے گا، اور قومی اسمبلی اور سینٹ سے کشمیر کے حوالے سے منظور ہونے والی قراردادوں کے بعد، سپیکرز کانفرنس میں بھی کشمیر کے حوالے سے قرارداد کی منظوری ایک اچھا پیغام جائے گا۔
تازہ ترین خبروں، تجزیوں اور روز مرہ کے واقعات کی اپ ڈیٹس کے لیے واٹس ایپ پر روزنامہ ’’گل بات‘‘ کا ’آفیشل چینل یا آفیشل گروپ‘ جوائن کریں